Поранешниот италијански премиер, Силвио Берлускони (86) е примен на одделението за интензивна нега во болницата „Сан Рафаела“ во Милано поради срцеви проблеми, изјави извор близок до него за „Франс прес“.
Според италијанската новинска агенција АНСА, неговата состојба е „стабилна“.
Берлускони, чија партија „Форца Италија“ е дел од владината коалиција на премиерката Џорџа Мелони, во последно време сè почесто е во болница. Во април во 2021 година, тој беше хоспитализиран повеќе од три недели поради последици од ковид-19, вирус на кој беше позитивен во септември во 2020 година.
Берлускони со години има вградено пејсмејкер, во 2016 година беше подложен на операција за замена на залистоци на аортата и се излекува од рак на простата. Во 2019 година беше на операција поради блокада на желудникот.
