Европската унија (ЕУ) и САД очекуваат лидерите на Србија и Косово, утре во Брисел, да го прифатат европскиот предлог, како појдовна точка за целосно решавање на односите меѓу двете страни и да почнат да работат како да го спроведат во рок од неколку месеци, јави српската агенција Бета.
Европски дипломати на затворен брифинг им рекле на новинарите дека српскиот претседател Александар Вучиќ и косовскиот премиер Албин Курти, ставиле до знаење дека ќе ги претстават своите црвени линии и услови во однос на европскиот предлог, познат и како француско-германски план.
Дипломатите велат дека Унијата и САД се убедени дека овој предлог го зема тоа предвид и нуди решенија, а Вашингтон посочи дека конечниот договор ќе значи важни отстапки и болни компромиси за двете страни. Затоа, нема веднаш да се разговара за содржината на предлогот, кој е утврден во анексот и не е објавен, туку за чекорите за што поскоро спроведување.
И САД и ЕУ, кои велат дека не станува за понуда „земи или остави“, се категорични дека онаа страна која ќе го одбие предлогот ќе се соочи со тешки економски, финансиски и политички последици во односите со западот.
Официјални претставници во Брисел го образложија својот став дека прифаќањето и спроведувањето на овој договор од српска страна, значи де факто признавање на независноста на Косово, а не официјално, бидејќи тоа не се бара во појдовните точки и принципи на договорот.