Нема дополнителни рестриктивни мерки, вака одлучи Комисијата за заразни болести по денешниот состанок и покрај тоа што зголемен е бројот на новозаразени за 79,9 % во однос на минатата недела. Нема загрозување на здравствениот систем и покрај тоа што се бележи тренд на зголемување на амбулантски прегледи, не е зголемен ниту бројот на пациенти со тешка клиничка слика вели доктор Мехмедовиќ.
„Во исто време е констатирано дека болничките капацитети се слободни, имаме мал број на хоспитализирани пациенти, што ги добивме од Клиниката за инфективни болести и другите оделенија за инфективни болести во државата и има хоспитализирано се на се 25 лица, од кои на Клиниката за инфективни болести две се на поддршка со кислород, останатите се во стабилна состојба“ – вели Злате Мехмедовиќ од комисијата за заразни болести.
Во меѓувреме Комисијата за заразни болести работи на реорганизирање на системот на примарна здравствена заштита кој во моментов е најзасегнат и одлуките ќе бидат соопштени наредната недела.
„Дополнително беше дискутирано и за недостатокот на тестови, односно тестирањата во институциите кои се надлежни за тоа. Дополнително беа дадени насоки од Комисијата да се дуплира капацитетот на тестови на дневно ниво, а онаму каде што има потреба и за зголемување на така дуплираната бројка за да се излезе во пресрет на потребите на граѓаните“ – додава Мехмедовиќ.
Согласно податоците од Институтот за јавно здравје, Министерството за здравство информира дека во последните 24 часа направени се 1.385 тестови, а регистрирани се нови 504 случаи на КОВИД-19.
Во моментот во Македонија има над 2300 активни случаи. Најмногу заразни има во Скопје, додека во Крушево, Пехчево и Македонска Каменица нема активни случаеви на вирусот.
Додека состојбата со ковид-19 во земјава е стабилна, во Европа и регионот се подготвуваат за нов бран.
Во Бугарија веќе од понеделник се враќа носењето заштитна маска. Во Албанија расте бројот на нови случаи со Ковид-19 и речиси секој втор тестиран е позитивен. Според Светската здравствена организација во светот веќе петта недела расте бројот на нови случаи заразени со новиот коронавирус, додека бројот на починати е релативно стабилен.
Нина Стефанова