За само една недела бројот на позитивни случаи во Македонија е зголемен за околу 65 проценти.
Зголемувањето на бројот на позитивни случаи во светски рамки по извршените тестирања е предизвикано од омикрон варијантите BA. 4 и BA.5.
За професор Петличковски станува збор за варијанти кои не го почитуваат многу имунитетот создаден со претходните омикрон варијанти и со вакцините кои претходно циркулираа.
Се очекува да има зголемување на бројот на нови инфекци, но здравствените лица се надеваат дека нема да биде зголемен и бројот на хоспитализации.
„Кај нас не се потврдени BА. 4 и BА. 5 варијанти, но според искуството од сите земји во светот новиот бран којшто е во зачеток веќе кај нас во последниве две недели многу е веројатно речиси сигурно дека новите инфекции се должат на BА. 4 и BА. 5 варијантите. Мислам дека во следниве недела две ќе имаме резултати, податоци од секвенционирање на наши примероци“ – вели проф-др Александар Петличковски, претседател на Комисијата за заразни болести.
И покрај фактот дека многу мал дел од инфицираните стигнуваат до болница, не можеме да се надеваме дека тоа така ќе функционира затоа што на толкав број ќе се појават и случаи со потешка клиничка слика, додава првиот човек на Комисијата за заразни болести. Новата Омикрон-варијанта се шири со забрзано темпо, затоа вакцинацијата е исклучително важна.
„Но, постоечките вакцини и во овој момент се многу ефикасни особено за спасување на животот, за елиминирање на шансата за смртен исход и тоа е дефинитивно. Овие податоци ги наведува и СЗО која на 17 јуни излезе со една препорака за светско справување со пандемијата дека многу е логично и практично во овој момент да се размислува за трета доза некаде и за четврта доза со постоечките вакцини бидејќи во сите релевантни студии бустер дозата обезбедува дополнителна заштита и од BА.4 и од BА. 5 варијантите кои циркулираат сега“ – додава Петличковски.
Се очекува веќе од октомври да има нова вакцина за омикрон варијантите.
Сепак бранот ни се случува сега, вели Петличковски и сите кои сакаат да го заштитат своето здравје треба да ги почитуваат тековните препораки на СЗО и сите релевантни научни институции што значи да биде примена најмалку трета доза.
Нина Стефанова