Догорува дрвото во конструкцијата и се лади сè што синоќа се топеше во огнот. Покривот веќе го нема, а третиот кат е целосно опустошен. Остана само фасадата препознатлива за овој објект изграден пред повеќе од еден век.
Порано и сега позната како зграда на “Жито Битола”, но веќе подолго време е во приватно сопствеништво. Припаѓа на еден локален маркет, а производствената намена на погонот остана иста како и некогаш – тука се прави леб, а се произведува и брашно. Пожарникарите речиси три часа се бореа со пламенот, пред да успеат целосно да го изгаснат.
Зградата била изградена во османлиско време, а токму и тоа ја отвори дилемата – дали и колку истата е заштитена. Надлежните одговараат дека објектот не е заведен како индивидуален споменик на културата, но одредена заштита постои – барем на хартија.
Силосите со жито се спасени и пченицата е сочувана, информираа пожарникарите од прва рака, кои останаа да дежураат цела вечер, за да не се појави пламен поради тоа што денес напладне густ сив чад сè уште се издигнуваше над остатоците од објектот. Нивната операција ја оценија како ризична бидејќи во зградата немало бетонски плочи помеѓу катовите туку подови со дрвени греди.
Петар Догов