Нови Сад, главниот град на српската покраина Војводина од вечерва официјално ќе биде една од европските престолнина на културата за 2022 година. Свеченоста започнува во 18 часот во Српското народно позориште од Нови Сад. А, спектакуларната претстава која вклучува 60 изведувачи и повеќе уметнички изрази како театар, музика, танц и акробатика , е насловена „ Зенитеум 2022 година“ и ќе започне во 20 часот и 22 менути. Неа ја режира авангардниот словенечки уметник Драган Живадинов. Тој за српските медиуми изјави дека претставата е прослава на уметноста и науката, или поконкретно, математиката, физиката и астрономијата, како научни дисциплини.
Главни ликови во спектаклот се математичарите Милева Мариќ Анштајн ( во изведба на Анита Манчиќ) и Милутин Миланковиќ ( го толкува Борис Исаковиќ). Спектаклот ќе се одржи на булеварот „ Михајло Пупин“, пред импозантната архитектонска градба на палатата Бановина. Неговиот визуелен израз е инспириран од уметничкото движење „ Зенитизам“ и списанието за модерна уметност„ Зенит“, кое меѓу двете светски војни го основал Љубомир Мициќ.
Овие содржини се дел од програмата „ Дочек“, со која Нови Сад двојното се отвора како годинашна европска престолнина на културата.
Поради пандемијата беа пуштени редуциран број билети за посетителите на програмите, а зголемениот број заболени со Ковид- 19, со сојот омикрон, влијаеше организаторот -Фондацијата „ Нови Сад – Европска престолнина на културата“, дополнително да откаже дел од концертите, планирани за вечерва на различни локации , во затворен простор.
Во предвечерието на свеченото отворање , синоќа театарот на унгарското малцинство „ Ујвидеки Шинхаз“, ја изведе премиерата на претставата „ Идиот“ , од Достоевски, во режија на нашиот Андреј Цветановски.
Сите содржини од програмата на оваа европска престолнина на културата, до крајот на годината ќе бидат реализирани под мотото „ За нови мостови“, што значи славење и поврзување на културните разлики. Планирани се 1500 настани, со учество на 4000 уметници од Србија, регионот и од светот.
Покрај Нови Сад, европски престолнини на културата годинава се градовите Eш (во Луксембург) и Каунас( во Литванија).