Со перформанс во Македонска пошта, во 16 и 30 часот, кој произлезе од петдневната интердисциплинарна работилница, под наслов „Изгубено и најдено“ , реализирана под менторство на Томас Жишка и Драган Стојчевски од Чешка и Филип Јовановски од Македонија, денеска започнува 16 издание на фестивалот за современи уметности – АКТО. Перформансот е реализиран во соработка со „ Факултетот за работи што не се учат“ и фестивалот АКТО, а во него настапуваат студенти од факултетите за драмски уметности и ликовни уметности од Скопје и од Факултетот за драмски уметности од Прага.
Ова издание на фестивалот АКТО, носи наслов „ Современи (не)демократии. Го задржува критичко- уметничкиот пристап кон обработката на актуелните теми. Програмата содржи перформанси, отворање на изложби и промоции на книги, а е распоредена да трае до 18 декември.