За два дена, ДИК донесе две различни упатства кои гласачки ливчиња треба да се сметаат за важечки. Вчера им посочи на изборните органи дека е доволно да биде видлива волјата на гласачот, па макар и да нема печат на гласачкото ливче, а денеска го повлече овој став и се врати на ставот утврден во согласност со Изборниот законик уште во март минатата година: за да биде важечко, гласачкото ливче мора да добие печат од избирачкиот одбор.
Даштевски најавува покренување кривична постапка доколку Избирачкиот одбор не ги почитува процедурите, односно не става печат на секое ливче што му се дава на гласачот.
Членовите на ДИК и овој пат се едногласни дека одговорноста за различните упатства не треба да се бара кај нив туку кај Управниот суд. Судот, одлучувајќи по тужба на Движењето „Одлучно за промени“ предводено од ЛДП и ДОМ за општина Шуто Оризари, заклучил дека на голем број гласачки ливчиња јасно била изразена волјата на гласачите, но не биле земени предвид при сумирањето на резултатите поради грешка на избирачките одбори кои не ставиле печат. Ова е утврдено при увидот во изборниот материјал. Крајниот резултат е – прегласување.
Бидејќи има влијание врз резултатите, в недела на едно избирачко место ќе се повтори гласањето за советот на Шуто Оризари и за советот на град Скопје, а во Дебар на едно место пак ќе се гласа и за совет и за градоначалник. Втор круг ќе има во 44 општини и во Скопје, а во Центар Жупа и во Маврово-Ростуше повторно треба да бидат распишани избори бидејќи на 17-ти не изглегле на гласање ниту една третина од запишаните избирачи.
Соња Николовска