ВМРО-ДПМНЕ не верува во оставка на премиерот Заев. Лидерот на опозицијата Христијан Мицкоски вели дека повеќе пати слушнал ваква најава, но таа ниту еднаш не се реализирала. Според него, повеќе треба да бидеме вознемирени од намерите на СДСМ и ДУИ да продолжат со крадење на народот, доколку останат на власт.
Синоќа во телевизиско интервју, Зоран Заев им порача на граѓаните дека на 31 октомври не треба да седат дома, туку да излезат на гласање и да му речат „не“ на режимот, национализмот, поделбите, барокот… Тој нагласува дека не би можел да ја води државата кон прогрес и евроинтеграции доколку новите градоначалници на главниот град и на општините влечат во спротивен правец.
Заев признава дека со овие пораки се обидува да го мобилизира гласачкото тело. Слични пораки упати и минатата недела, па дел од јавноста протолкува дека доколку СДСМ не победи на градоначалничките избори во Скопје, премиерот Заев ќе си поднесе оставка од премиерската функција.
Соња Николовска