Кровната површина на Драмскиот театар во 2018 година била целосно заменета со нова , освен страничните ѕидови на кулата. А, во договорот со фирмата изведувач бил даден гарантен рок од 1 година. Ова е констатирано денеска, по увидот во документацијата за поправката на кровот, при што бил извршен и разговор со тогашниот технички директор, соопштија од Драмскиот театар.
- НУ Драмски театар ќе се обиде да изврши привремена санација на местата каде што протекува кровот. Сепак, за подолготрајно решение потребен е поголем градежен зафат со целосна реконструкција, а не санација, за што се потребни поголеми финансиски сретства, велат од Драмски.
Додека не заврши санацијата на кровот, театарот ќе продолжи со проби, а претстави ќе може да се играат само на малата сцена, додаваат од Драмскиот театар.
Поради врнежите од дожд, кровот на Драмски пред празничниот викенд протече на и околу сцената, иако во 2018 година поради истите проблеми беше поправен со сретства од Министерството за култура, во висина од 54 000 евра. Небезбедните услови за актерите и за публиката го принудија раководството во саботата да ја откаже изведбата на претставата „ Мојот маж“, во режија на Нела Витошевиќ, а привремено беа откажани и пробите за новите претстави и изведбите на тековниот репертоар.
Драмски театар работи во повеќепати поправана монтажна барака од 1965 година, добиена како донација од Британската амбасада по Скопскиот земјотрес.
