Текстилните работнички од конфекцијата „Алкон текс“ не попуштиле под притисок, туку денешниот протест пред фабриката го откажале поради временските прилики. Протестот на 50-те работници, ќе продолжи наредната недела.
Овие работнички се на принуден одмор и си ги бараат платите, како и да продолжат како вработени на неопределено, а не на определено време во друга фирма. Чекаат и одговор од инспекциите, кои деновиве влегле во фабриката.
-Се уште очекуваме одговор од институциите, кои ги повикавме, да излезат на терен да ја проверат состојбата и да дадат извештај за нивната работа, што имаат пронајдено и кој е следниот чекор. Се додека не добиеме извештај од нив ќе протестираме, за да ги оствариме своите права, вели Кафтанова.
Од Гласен Текстилец велат дека ова не е изолиран случај, со вакви проблеми се соочуваат и работнички од други конфекции во Штип, но и во соседните градови.
Текстилните работнички добија поддршка и од Конфедерацијата на слободни синдикати и Хелсиншкиот комитет за човекови права.
Викторија Јованова