Прозивки кон политиката на ЕУ, официјална Софија, но и кон нашиот политички врв кој се обидува да го одблокира патот за почеток на евроинтегративните процеси, упатија денеска од МАНУ на промоцијата на Зборникот „ Прилози кон историјата на Македонија и на македонската култура“.
Книгата не е упатена кон нашите источни соседи , туку кон оние анационални фигури меѓу нас, кои не убедуваат дека можат да се договорат или испазарат со тугинци околу нашиот идентитет , без притоа да се разменат со факти, рече на промоцијата на Зборникот „ Прилози кон историјата на Македонија и македонската култура“, академик Витомир Митевски. Според него, книгата со прилози е израз на нашата колективна меморија.
Сите тие сведочат против небулозите на оние што сметаат дека светот и историјата започнуваат од нивното доаѓање на власт.Сведочат и против оние што си вообразуваат дека кај нас се започнало од 1945 година на минатиот век и против оние кои со доза на цинизам прогласуваат некаков роденден на македонскиот јазик , во истата таа 1945 година, вели академик Витомир Митевски.
Поконкретен во прозивките беше претседателот на МАНУ, цитирајќи ја мислата на Грамши „ Историјата учи, но нема ученици“.
Таа мисла во Македонија, за жал премногу често се однесува на дел од нашите политичари . Па така тие се сѐ, само не ученици на историјата . А, јас би додал уште помалку добри познавачи на историјата , за да можат со толкава леснотија да се однесуваат кон неа и кон македонската култура, вели академик Љупчо Коцарев, претседател на МАНУ.
Македонија денес е исправена меѓу две зла: Да се откаже од она што била и да прифати да биде нешто фиктивно. Време е да се запрашаме дали оние кои ја поставуваат историјата како услов за нашата интеграција во ЕУ, користат дискурс на репресија, рече приредувачката на книгата, академик Катица Ќулафкова.
Време е да се запрашаме , дали оние кои ја поставуваат историјата како услов за европска интеграција и користат дискурс на репресија во однос на нашето потекло и име, не прават обратна проекција? Дали зад таквиот репресивен дискурс стои хегемонистичка аспирација ? Кому му пречи македонската историска приказна? Кому, македонскиот суверенитет? прашува академик Катица Ќулафкова.
Треба да излеземе од зоната на колективното слепило, правејќи мост меѓу минатото и иднината, потпирајќи се на историската наука и на визијата. Отпорот против порекнувањето на идентитетот е извор на нашата моќ. Ако сме суверена држава треба да се угледаме на другите суверени држави и да го бараме она што ни следува , според меѓународните конвенции, дополни академик Ќулафкова.
Сотир Трајков