Почна вакцинацијата на населението над 77 години во штипскиот регион. Пунктовите за вакцинација во здравствениот дом се отворија во осум часот, а најстариот пациент, кој успешно ја прими вакцината има 91 години.Директорката на Здравствениот дом-Штип, Снежана Трајковска вели дека наместо 120, доцна синоќа добиле 400 вакцини од АстраЗенека.
До 11 часот се вакцинирале 12 граѓани, а само еден се откажал, бидејќи не се чувствувал добро, информирал матичниот лекар. здравствените работници чекаат насоки за оние граѓани над 77 години, кои не можат да дојдат на пунктот, кој е на вториот кат, поради здравствени причини, но и од руралните средини.
Штипјани кои утринава ја примија вакцината велат дека се чувствуваат добро и се задоволни од организацијата на пунктот. Сметаат дека имунизацијата на населението е спас од коронавирусот.
Во Брегалничкиот регион од денеска вакцинација на граѓаните се реализира само во Штип, каде што доколку има масовна имунизација дневно би аплицирале и 400 вакцини. Во Кочани и Делчево вакцинирањето на населението над 77 години почнува од петок, во овие два Здравствени домови пристигнати се 500 вакцини против Ковид 19.