Откако вчера програмерите открија дека апликацијата за попис прифаќа и невалидни матични броеви, денеска нов проблем – не се прифаќаат ниту валидни. На фејсбук страницата на Државниот завод за статистика, постојано се поставуваат прашања за овие проблеми.
Одговорот на прашањата е – испратете мејл. Тие што испратиле, се жалат дека не добиваат одговор.
Од Државниот завод тврдат дека апликацијата не прифаќа броеви со сите нули, но и не прави никакви прилагодувања или обработка на податоците внесени од страна на лицата кои се самопопишуваат.
Пријавени се и случаи на добивање на верификацискиот код, но во спам. Ова, велат од Статистика, зависи од сетирањата на компјутерите или другите електронски уреди од кои се пристапува. Затоа советуваат дека е најдобро да се пристапи од компјутери или лаптопи.
Што се однесува до поплаките дека за пописот се информираат од медиумите во Македонија и дека никој таму не ги известил дека ќе се спроведува ваква операција, велат дека Кампањата за информирање на иселеницете се одвива преку социјалните медиуми и веб-страницата Попис2021, како и преку дипломатско-конзуларните претставништа во странство.
Имаат отворено и две телефонски линии на кои граѓаните од странство можат да пријават проблем.
Досега се попишале над 22 000 лица од дијаспората.
Далиборка Дамјанска Цветановска