Штип нема да добие карго аеродром, но 75 општини во земјава ќе добијат вкупно 35 милиони евра за 99 инфраструктурни проекти.
Најмногу, 6 милиони евра, ќе добие Градот Скопје, за клучката „Момин Поток“ и мостот „Карпош“. Охрид ќе добие пари за реконструкција на кејот на езерото. 1 милион евра се наменети за Тетово, за обнова на училиштето „Кирил Пејчиновиќ“ и изградба на патот „Благоја Тоска“.
Во Кичево треба да се реконструира центарот на градот, капелата, центарот за кучиња скитници и котларата. Во Штип над 1 милион евра се наменети за изградба на линија 2 со резервоар „Мерите“.
Шуто Оризари ќе добие пари за изградба на атмосферска канализација на 4 улици, а дел од парите ќе добијат и Чаир, Струмица и Струга.
Парите се за водоводни мрежи, канализации, локални патишта, градинки, основни училишта, системи за водоснабдување и резервоари за вода.
Проектот за карго аеродромот требаше да биде готов оваа година, но беше напуштен поради несоодветните климатски услови и економска неоправданост.
Далиборка Демјанска Цветановска