Драматична слика на Клинички – медицински лица во скафандери и пациенти коишто се борат за секој здив, на носилки и во трка со времето. Амбулантни возила со вклучени сирени се пробиваат до Интерните клиники каде што функционираат Ковид-центрите. Ваквата глетка е реална, а ова е секојдневието на медицинскиот персонал, веќе осум месеци. За едно деноноќие повторно четириесетина нови пациенти се згрижени во болница поради тоа што вирусот направил тешка клиничка слика кај овие луѓе. Од нив 24 се на Интерните клиники. Започна да се полни и новото одделение на Клиниката за Гастро, со примени 17 пациенти откако беше отворено.
Од вчера овде, на Интерните клиники започна да функционира Ковид-центарот на Клиниката за Гастроентерохепатологија. Се очекува да започне да работи и Ковид-центарот на Клиниката за Нефрологија. Обезбеден е довод на кислород за сите новозгрижени пациенти или како што велат докторите, оние средно-тешки пациенти.
Од новопримените пациенти со Ковид во последните 24 часа, најмногу од нив се токму на Гастро. Четворица пациенти биле хоспитализирани на Институтот за белодробни заболувања и ТБЦ и тројца во Ковид-центарот на Клиниката за Неврологија. Министерот за здравство Венко Филипче кој денеска присуствуаше на донација на едно амбулантно возило, во Струмица, изјави дека болниците во целата земја се соочуваат со недостаток на медицински кадар и дека во моментов нема ниту еден невработен или неангажиран лекар во државата.
Иако има слободни болнички кревети, состојбата е критична повторно потсети министерот Филипче. Показател за тоа е бројката од 410 пациенти потврдени или сомнителни на вирусот кои се лекуваат на инфективните оддели во болниците во главниот град, а голем дел од нив на кислородна поддршка.
Петар Догов