Во пресрет на судењето закажано за 22 септември охридскиот суд вчера ги пушти браќата обвинети за насилство да излезат од притвор откако понудиле гаранција – деловен простор во Охрид проценет на 850 илјади евра. Оваа гаранција била доволно висока за охридскиот судот да ја прифати и да им го укине притворот откако и обвинителството дало позитивно мислење.
По 16 дена минати во охридскиот затвор советникот на ДУИ и бизнисмен Нефи Усеини и неговиот брат Ибраим, излегоа од притвор. За да се бранат од слобода понудиле гаранција во недвижен имот проценет на 850 илјади евра. Кривичниот совет вчера ја прифатил гаранцијата и го укинал притворот, откако и обвинителството дало позитивно мислење , потврди за Телма претседателот на судот Васил Баткоски.
Државата ќе може да ја активира хипотека, ако браќата избегаат. Станува збор за дуќан со вкупна површина од над 250 метри квадратни во нова зграда во Охрид, изградена од фирмата на Усеини. Вредноста на овој недвижен имот ја утврдил официјален проценител од Охрид.
Од обвинителството објаснуваат дека дале позитивно мислење за да се укине притворот бидејќи веќе собрани се доказите и има подигнато обвинение против, но и со оглед на висината на гаранцијата.
Претходно одбраната нудеше гаранција во кеш од 30 илјади евра за да им биде заменет притворот, но иако охридскиот суд прифати, битолска апелација го укина ваквото решение.
Браќата Усеини ќе треба да се појават во судница на 22 септември за кога е закажаано првото рочиште. Обвинителството ги гони дека сториле грубо насилство врз охриѓанецот Сприко Топаловски. Со предмет кој наликувал на пиштол браќата го удирале во главата и по телото и му нанеле повреди.
На почетокот Топаловски рече дека Усеини го удрил со пиштол, за потоа со писмена изјава да тврди дека оружје не видел туку дека бил удрен од позади и добил погрешен впечаток.
Кога судот првично им определи притвор браќата беа недостапни 6 дена по што сами се јавија во затворот.
За охридскиот советникот и бизнисмен имаше и други кривични пријави во минатото, но нема информација до каде се тие предмети.
Елена Ивановска Мукоска