До крајот на неделата се очекува собраниска седница за избор на работните тела. Договорот кој ќе раководи со комисиите е постигнат, но новата неизвесност е дали предлогот ќе добие мнозинство гласови. Минималното владеачко мнозинство од 62 пратеника отиде во минус еден со изборот на Јагода Шахпаска за министерка за труд. Мандатот на новата пратеничка се уште не е верификуван, а нема ниту која да го предложи бидејќи министерката беше и претседателка на Комисијата за верификација на мандатите. Дополнителен проблем е што интегративецот Арбен Зибери е во изолација, сомнителен за Ковид 19. Сепак, и СДСМ и ДУИ тврдат дека мнозинство има. Според Заев, поголемо од неопходното.
И ДУИ очекува изборот на комисиите да тече без проблеми, по договорениот принцип: по 8 претседатели на комисии за СДСМ и за ВМРО ДПМНЕ, 3 за ДУИ и две места за Алијанса-Алтернатива.
Според Деловникот, верификацијата на нови мандати треба да ја предлага Комисијата за деловнички и мандатно-имунитетни прашања, а таа, како и другите комисии, не е формирана. Сепак, премиерот Заев најавува и други кадровски промени, сметајќи на стабилно собраниско мнозинство. До крајот на неделава ќе ги предложи имињата на замениците министри, се договараат државните секретари, а до крајот на септември Владата ќе именува нови директори во повеќе јавни институции. Дел од нив ќе дојдат од пратеничките редови.
Соња Николовска
https://youtu.be/W5RnhPXnjPo