Милијардерот Андреј Бабиш положи денеска заклетва како нов премиер на Чешка, по парламентарните избори во октомври.
Ова е втор пат Бабиш да ја врши премиерската функција по периодот од 2017-та до 2021-та година, храбро ветувајќи им на Чесите дека ќе ја направи нивната држава – најдоброто место за живот на целата планета.
71-годишниот Бабиш, кој ја моделираше програмата на својата партија АНО, во превод ДА, по примерот на движењето МАГА на Доналд Трамп, ќе ја формира чешката влада со две помали десничарски партии.
Предвидувањата на аналитичарите се дека владата на Бабиш ќе го промени курсот на Чешка и дека неговата коалиција ќе го следи примерот на Унгарија и Словачка и ќе ја прекине поддршката на Украина во војната со Русија.
Членките на неговата коалиција се исклучително критични и кон политиките на Европската Унија, особено во поглед на заштитата на животната средина и миграцијата.
Бабиш сѐ уште се соочува и со обвиненија за злоупотреба на европските субвенции и новиот парламент ќе треба да го укине неговиот имунитет за да може судот да ја објави пресудата.
„Им ветувам на сите граѓани на Чешката република дека ќе се борам за нивните интереси, не само дома, туку и секаде во светот, дека ќе дадам сѐ од себе да ја исполнам програмата на владата и дека ќе направам сѐ што можам да ја направам Чешката република најдоброто место за живот на целата планета“ – изјави Бабиш по положувањето заклетва.
Н.И