Федерален судија во Вашингтон ѝ наложи на администрацијата на Доналд Трамп да го запре отпуштањето на стотици вработени од Американската агенција за глобални медиуми (УСАГМ), која е сопственик на Гласот на Америка.
Судијата Ројс Ламберт наведе дека владините претставници покажале „вознемирувачко непочитување“ на наредбите на судот. Тој го блокираше планот за отпуштање додека разгледува дали УСАГМ се придржувала до наредбата што ја издаде во април „да ја исполни својата законска должност да обезбеди Гласот на Америка постојано да биде сигурен и авторитативен извор на вести“.
Од УСАГМ отказ добиле 532 вработени на полно работно време, а ВОА, по наредба на американскиот претседател Доналд Трамп беше затворен во март.
Според судијата Ламберт, УСАГМ и нејзиниот извршниот директор, Кери Лејк, „немаат план да се придржуваат до прелиминарната забрана“.
– Наместо тоа, тие чекаат да заврши фискалната година, додека продолжуваат да го кршат дури и најограниченото толкување на законските обврски на УСАГМ и ВОА, посочи Ламберт.