Украинскиот претседател Володимир Зеленски денеска изјави дека неговата земја „де факто се интегрира во Европската Унија“, додека учествуваше на состанокот на Конгресот на локални и регионални власти на Украина со претседателот на Советот на ЕУ, Антонио Кошта, во Ужгород, Украина, јави АП.
- „Работиме на отворање кластери – постигнуваме резултати и тоа го правиме заедно со Европската Унија. Сите наши програми за соработка функционираат денес: одбраната пред сè, енергијата, програмите за буџетска стабилност, кои се толку важни за поддршка на нашите луѓе“, рече Зеленски додека се обраќаше пред Конгресот.
Кошта во својата изјава пред конгресот нагласи дека „иднината на Украина е во Европската Унија“.
- „Реформата на децентрализацијата што дава поголема моќ на локално ниво е од витално значење за приближување кон ЕУ. Ве охрабрувам да продолжите да го зајакнувате локалното донесување одлуки и да градите капацитети на регионално ниво“, додаде тој.
Во Ужгород, Зеленски, исто така, се сретна со шведската министерка за надворешни работи, Марија Малмер Стенергард, која ја посетува Украина по втор пат откако ја презеде функцијата.
Според Кабинетот на украинскиот претседател, страните разговарале за поддршката на Украина и подготовката на нов пакет за одбрана.
© 2020 Телевизија Телма. Сите права се задржани.
Овој текст не смее да се печати или емитува, во целина или во делови, без договор со Телевизија Телма.