Џекпотот на американската лотарија „Powerball“ достигна неверојатни 1,7 милијарди долари, откако и на последното извлекување во средата вечерта немаше добитник на главната награда.
Извлечените броеви беа: 3, 16, 29, 61 и 69, а „Powerball“ бројот беше 22.
Ова е веќе 41. последователно извлекување без добитник на главната премија, што придонесе за значителен раст на џекпотот. Следното извлекување е закажано за сабота вечер, и според проценките, ова ќе биде третиот најголем џекпот во историјата на САД.
„Powerball“ е познат по своите ниски шанси за главна добивка – само 1 во 292,2 милиони, што овозможува наградите постојано да се зголемуваат. Сепак, организаторите истакнуваат дека шансите за помали добивки се значително подобри. Извлекувањата се одржуваат три пати неделно.
Џекпотот од 1,4 милијарди долари што се нудеше на извлекувањето во средата важеше за добитник што би избрал годишна исплата во 30 рати во текот на 29 години. Сепак, повеќето добитници се одлучуваат за исплата во готово, која во овој случај би изнесувала околу 634,3 милиони долари.
„Powerball“ билетите чинат 2 долари и се продаваат во 45 американски сојузни држави, како и во Вашингтон, ДЦ, Порторико и Американските Девствени Острови.