Швајцарија ќе му даде имунитет на рускиот претседател Владимир Путин, и покрај обвинението против него пред Меѓународниот кривичен суд, под услов да допатува на мировна конференција, изјави денеска швајцарскиот министер за надворешни работи, Ињасио Касис.
Сојузната влада лани ги дефинираше условите за давање на имунитет на лица под меѓународна потерница, во случај поединецот да доаѓа на мировна конференција, наместо од приватни причини, истакна Касис на прес-конференција со неговиот италијански колега Антонио Тајани во Берн.
Пораката од Касис доаѓа по изјавата на францускиот претседател Емануел Макрон која ја гледа Женева како можен град домаќин на претстојниот состанок меѓу рускиот лидер Владимир Путин и украинскиот претседател Володимир Зеленски. Макрон притоа додаде дека Женева не е само хипотеза, туку колективна волја, бидејќи желба е состанокот да се одржи во некоја неутрална држава.