Во Газа Сити денеска пристигна камион со питка вода, очекуван со нетрпение од жителите кои живеат во пренатрупани шатори и во крајно лоши услови.
Помошта пристигна во момент кога животните услови во појасот на Газа се сѐ полоши поради долгата војна и уништената инфраструктура.
Израел продолжува да се заканува со проширување на воената офанзива во деловите од Газа кои сѐ уште не се под негова контрола, а токму таму се засолниле најголем дел од над два милиони жители.
Таквите најави предизвикаа критики и меѓународно негодување, но и внатрешни несогласувања во Израел.
Војната предизвика масовно раселување, уништување на населени места и доведе до хуманитарна катастрофа со ризик од глад.
Хамас сѐ уште држи околу 50 заложници од нападот во октомври, а израелските власти веруваат дека околу 20 од нив се сѐ уште живи.
Преговорите за прекин на огнот засега се во ќорсокак.