Германските власти издадоа потерница по осомничениот во бегство за прегазувањето со комбе во близина на фестивалот Прајд во Берлин, при што едно лице загина, а најмалку 16 други беа повредени.
Полицијата и обвинителите побараа помош за пронаоѓање на 21-годишниот осомничен, кого го идентификуваа како Абдул Б.
„Моментално имаме уште едно ажурирање во врска со истрагата тука во Гросер Тиергартен. Врз основа на првичните наоди на истражителите, веќе идентификувавме осомничен сторител. Мерките против овој осомничен, кој сè уште не е уапсен, сепак, тој е познат на полицијата, веќе се во тек. Тој ни е познат како член на исламските „кругови“ тука во Берлин. И нашата потрага по ова лице продолжува со полна брзина. Најверојатно, денес или во наредните часови ќе побараме и од јавноста помош во потрагата“ – Флоријан Нат, портпарол на берлинската полиција.
Тие рекоа дека се верува дека повредил неколку лица со возило во движење доцна во саботата навечер, и дека едно или повеќе лица очигледно потоа го напуштиле тоа возило.
Освен тоа, неколку лица очигледно биле избодени со нож, додадоа тие.
Денешното соопштение ја предупреди јавноста да избегнува „директен контакт“ со осомничениот, велејќи дека може да биде вооружен и опасен.
Полицијата претходно соопшти дека идентификувала осомничен кој има врски со исламски групи во германскиот главен град.
истражителите немаат информации за „неговите специфични мотиви“.
Полицијата спроведе операции во градот додека го бараше осомничениот.
Тие вклучуваа претрес во стан во берлинскиот кварт Шенеберг во раните утрински часови во неделата, но полицијата соопшти дека не пронашла никого таму.
Според полицијата, бело комбе влегло во паркот Тиергартен околу 22 часот и удрило во неколку луѓе пред да се судри со дрво.
Завршната забава на фестивалот Прајд, позната како Ден на улицата Кристофер, во тој момент била во тек покрај Бранденбуршката порта, на кратко растојание, по парадата со околу 80 камиони што претходно во текот на денот се пробиле низ центарот на Берлин.
Полицијата соопшти дека една жена е убиена. Берлинската противпожарна служба соопшти дека три лица се здобиле со животозагрозувачки повреди, уште осум се сериозно повредени, а петмина имаат полесни повреди.
Парадата Прајд покрај Бранденбуршката порта беше откажана околу 22:15 часот, а настапот на бендот на сцената беше прекинат.
Луѓето беа повикани да си одат дома и да избегнуваат да ја користат рутата низ паркот.
Б.С.