Поранешната висока дипломатка на ЕУ, Федерика Могерини, и висок функционер на Европската комисија, Стефано Санино, се ослободени по приведувањето во Брисел, но се уште се осомничени за измама во јавни набавки.
Двајцата беа испрашувани од белгиската федерална судска полиција, по рациите спроведени во дипломатската служба на ЕУ, Колеџот на Европа и нивни приватни резиденции.
Обвинителите се сомневаат дека Могерини и Санино во 2021 и 2022 година го насочиле јавниот договор за нова дипломатска академија на ЕУ кон Колеџот на Европа, каде што Могерини е ректор.
Истрагата, која опфаќа обвиненија за измама, корупција, судир на интереси и кршење на професионалната тајна, продолжува.
Белгиските власти соопштија дека осомничените се ослободени бидејќи не се сметале за ризик од бегство и се сметаат за невини додека не се заврши истрагата.