Проектот „Средношколец милионер“, организиран од Brainster групацијата, го доби својот победник по два месеци натпревар и разгледување на 438 бизнис идеи од средните училишта во Македонија. Целта на проектот беше да се додели 1 милион денари на најдобрата бизнис идеја со најголем потенцијал.
Победници и добитници на милион денари се средношколците од Битола Иван Секуловски, Јован Талески и Марио Рабаџиевски. Нивната идеја, „Систем 4“, е систем базиран на вештачка интелигенција наменет за луксузни ресторани и хотели. Системот нуди три дигитални решенија, вклучувајќи телефонски агент кој прима повици и прави резервации, чатбот сличен на ChatGPT, но персонализиран за хотелот, и веб-страна изградена со AI алатки.
Тимот одлучи целата награда да ја инвестира во понатамошен развој на својот бизнис.
Ања Марија Макеска од Brainster, дел од жирито, посочи дека „Систем 4“ доминирал поради фокусот на вештачката интелигенција и потенцијалот за голем профит.
Второто место го освои тимот на Давид Милошоски од Скопје со проектот „Памет пакет“. Ова е едукативна кутија која го трансформира училишниот материјал во интерактивно и забавно искуство преку практични проекти, експерименти и стрип приказни.
Инвеститорите, препознавајќи го потенцијалот во решавањето на проблемите во основното образование, му понудија на тимот партнерство од 6.000 евра за 12% од бизнисот, понуда за која тимот ќе размисли.
Т.Д.