„Опседнат со идејата да убива деца“ вака го опишува полицијата лицето кое влезе во црква близу училиште уби две малолетни деца, повреди уште 18, а потоа oд прострелните рани кои си ги нанел сам починал.
Во американската држава Минесота, во градот Минеаполис 23-годишниот Робин Вестман отвори оган врз ученици кои во моментот се молеле во црквата „Благовештение“. Според истрагата, напаѓачот користел три легално купени огнени оружја и испукал десетици куршуми низ прозорците на училиштето. На местото е пронајдена и димна бомба.
Сведоците ги опишуваат сцените како хорор филм и дека никогаш нема да ја заборават глетка каде ранетите деца бегале од црквата, молејќи за помош.
Родителите на загинатите деца ја изразија својата скршеност и болка и повикаа на итна акција за да се запре насилството со оружје.
„Ниедно семејство не треба да трпи ваква болка“ рекоа семејствата.
Шефот на полицијата Брајан О’Хара изјави дека напаѓачот „повеќе од сè сакал да убива деца“, додека градоначалникот Џејкоб Фреј побара воведување забрана за оружје за напад и шаржери со голем капацитет. Властите велат дека убиецот дополнително оставил порака со говор на омраза, но и дека конечниот мотив можеби никогаш нема да биде познат.