Седум лица се приведени, а едно лице не е достапно на органите на прогонот за нелегална продажба на нафта во рамки на акцијата на Управата за финансиска полиција и на Обвинителството за гонење на организиран криминал и корупција и со асистенција на тигрите. Во текот на денешниот ден под раководство на предметниот јавен обвинител биле извршени претреси на повеќе локации на подрачјето на општина Липково, Куманово и Желино.
„Се работи за сложена предистрага која опфаќа повеќе правни и физички лица, а целта е целосно разоткривање на криминална група која дејстувала подолг временски период“, соопшти Управа за финансиска полиција.
Телма дознава дека претреси се извршиле на 8 локации, а предмет на истрагата се 13 луѓе и 10 фирми. Се гонат за злосторничко здружување, даночно затајување, даночна измама и перење на пари. Тие продавале нафта во кеш, а потоа парите ги пријавувале како дневен промет во фирмите преку фиктивини фактури и притоа барале и поврат на ДДВ. Направената штета на буџетот на државата се проценува на околу 7 милиони евра.
Извори за Телма велат дека дел од истрагата е фирмата Крон- Оил од Никуштак, Липково. Според податоците на Бизнис мрежа, може да се забележи дека Крон- Оил има пет подружници, односно неколку бензински пумпи. Во Никуштак под истото име како и фирмата Крон- Оил, потоа Чучер Сандево под името Беса петрол и во Гази баба, бензинска пумпа Б петрол.
Крон- Оил е формирана во 2011 година. Дејноста и е трговија на мало co моторни горива и мазива. Сосптвеници на фирмата се Бесник, Фатмир и Фаредин Синани. Фирмата лани имала приходи од 11 и пол милиони евра и за 3,4 проценти повеќе од претходната 2023 година. Годината ја завршила со добивка од речиси 667 илјади евра.
Инаку Бесник Синани е сопственик и на Беса Транс Гроуп од Липково која се бави со товарен патен транспорт. Фаредин Синани пак е директор на фирмата. Предистрагата на Финансиската полиција траела повеќе од 2 година.
Марија Митевска