Студентите во блокадата ги повикаа и вечерва граѓаните да излезат на улиците на градовите низ Србија. Како што јавуваат српските медиуми протести се закажани во Белград и тоа на три локации, во Нови Сад, во Крагуевац, во Горњи Милановац, Ваљево, Смедерево и во повеќе од 20 градови и општини во Србија.
Во Белград пред Генералштабот веќе се собраа голем број граѓани кои со свирежи го искажуваат својот револт против актуелната власт. Во исто време и полициските сили со своите возила се се побројни.
Антивладините протести во Србија станаа насилни синоќа, кога поддржувачите на претседателот Александар Вучиќ се судрија со демонстрантите, кои бараат промена на режимот од ноември.
Протестите ги обележа една невидена сцена – припадник на српските вооружени сили извади пиштол и пукаше во воздух.
Министерот Ивица Дачиќ рече дека станува збор за наредник-мајор на српските вооружени сили, „кој бил на службена мисија да обезбеди заштитено лице“. Без да наведе за кое заштитено лице станува збор.
Додека пак студенти во блокадата се на ставот дека владата сакала да предизвика граѓанска војна.
Во текот на денот во неколку градови во Србија се апсеа учесници на протестите, за кои беше консултиран и обвинител, кој за возрасните лица предлага притвор до 48 часа, а за малетниците кривична пријава во редовна постапка.
Според официјалните бројки повеќе од 80 граѓани се повредени, како и 27 полицајци.
ЕУ во соопштение потсети на важноста на слободата на медиумите и слободата на изразување. Брисел внимателно ја следи ситуацијата.
Reports of violence during recent protests in 🇷🇸 are deeply concerning. Advancing on the 🇪🇺 path requires citizens can express their views freely and journalists can report without intimidation or attacks.
— Marta Kos (@MartaKosEU) August 14, 2025
Европската комесарка за проширување, Марта Кос, на платформата X, изрази својата длабока загриженост за извештаите за насилство за време на синоќешните протести во Србија.
„Напредокот на патот кон ЕУ бара граѓаните слободно да ги изразуваат своите ставови, а новинарите да известуваат без заплашување или напади“, напиша Кос.