Рокот во кој организаторите на Зимзоленд треба да се изјаснат за забелешките од инспекцискиот надзор истекува утре. Општина Аеродром треба да постапува од утре, но сè уште не се открива на кој начин, дали со отстранување на забавниот парк или со санкции за утврдените неправилности.
Од општината денес велат дека набрзо ќе одлучат што понатаму, а ќе бидат земени предвид и ставовите што организаторите ќе ги достават. Понатамошните чекори ќе зависат од тие околности. Зимзоленд работи без дозвола, така веќе констатираше Град Скопје и и наложи на општината Аеродром да постапи.
„Инспекциските служби на Општина Аеродром постапуваат согласно своите надлежности. Извршен е инспекциски надзор на самото место, каде покрај другите институции беше вклучена и градежната инспекција на Општина Аеродром. Изготвен е записник со констатации кој е доставен до организаторот на Зимзоленд. Тече рокот за произнесување на неговиот став. Рокот истекува утре. По истек на тој рок општината ќе постапи според своите надлежности, но исто така ќе донесе и соодветно решение“, изјави Дејан Митески, градоначалник на Општина Аеродром.
Спротивно на властите, организаторите на Зимзоленд тврдат дека ги имаат сите документи и дозволи за работа и за безбедност. Во исто време при инспекциските контроли, Државниот пазарен инспекторат утврди вршење нерегистрирана дејност и најави казни. Агенцијата за храна и ветеринарство констатираше дека организаторот не е регистриран како оператор со храна и дека не се исполнети хигиенските услови, поради што изрече парични казни. Управата за јавни приходи пак утврди неиздавање фискални сметки и финансиски неправилности кај дел од субјектите.
Тамара Марковска