Тест периодот на системот Безбеден град повеќе од 15 дена снима прекршци, пред да почне и официјално да се применува. Граѓаните сметаат дека ќе ја зголеми безбедноста во сообраќајот.
„Безбеден град добро е, тоа е во ред. Сега луѓето ќе бидат покултурниво сообраќајот, во криминал што се прави итн“, вели граѓанин.
Во меѓувреме, Министерството за внатрешни работи отвори и нов шалтер во зградата на Македонската телевизија. Ќе работи секој работен ден од 8 до 17 часот, и граѓаните туке ќе можат да ги ажурираат контакт-податоците што ги оставиле при регистрација на возилата, доколку има промена или доколку добиле известување со неточни податоци. Истата услуга ќе биде достапна и во станиците за технички преглед низ дражавата.
„Исто така, граѓаните по електронска пошта на [email protected] ќе можат да достават писмена забелешка доколку имаат нејаснотии, прашања или проблеми поврзани со функционирањето и примената на Безбеден град “, вели Гоце Андреевски портпарол на МВР.
Камерите веќе ги евидентираат сообраќајните прекршоци, а системот автоматски ги испраќа известувањата по електронска пошта и порака до сопствениците на возилата Иако беше најавено дека тест-периодот ќе трае до крајот на годинава, казните ќе ги заменат опомените од почетокот на февруари идната година. Системот ќе функционира во Скопје, Тетово и Куманово.
Симона Петровска