Победа за правната држава според власта, окупација според опозицијата. Вака е протолкувана одлуката на државниот обвинител Љупчо Коцевски, пред да биде разрешен, сам да си даде оставка од двете политички партии ВМРО-ДПМНЕ и СДСМ. Според владеачката ВМРО-ДПМНЕ, за првпат самиот обвинител признал дека обвинителството не може да продолжи да функционира со изгубен легитимитет. Ова, според владеачката партија, е почеток на демонтажа на заробените институции од СДСM и ДУИ.
„Со оваа оставка се става крај на еден мрачен период, во кој обвинителството беше перципирано како партизиран механизам, а не како независна институција во служба на законот. Дали затоа и чекаше оставката да биде на последниот ден кога ќе биде разрешен за да им купи време на неговите наредбодавци? – Исто така, дали е точно дека група обвинители на чело со Коцевски заташкуваат преку 40 случаи на висока корупција против корумпираните функционери на СДС, ДУИ и други партии?“, вели Петрушевски.
За опозициската СДСМ, пак, притисокот за смена на јавниот обвинител е дел од сценариото на ВМРО-ДПМНЕ и Мицкоски за целосно да ги преземе обвинителството и судството. Така, според СДСМ, ќе се врши политички прогон, има измислени кривични пријави, партизација и злоупотреба на институциите.
„Обвинител под контрола на Мицкоски и ДПМНЕ. Судии под контрола на Мицкоски и ДПМНЕ. Целосна окупација и партизација на судството, враќање на „тефтерчињата“ и погребување на правдата. Исто како во времето на Никола Груевски и по истото сценарио што Вучиќ го спроведува во Србија“, реагираат од СДСМ.
Инаку, Владата предложи разрешување на Коцевски поради „направени крупни професионални грешки и нарушување на угледот на Јавното обвинителство и неговиот личен углед. Претходно, Советот на јавни обвинители даде негативно мислење на предлогот на владата со образложение дека нема докази за наводите на власта.
Билјана Николовска Тодорова