Граѓаните денеска не можат да добијат изводи и други документи од Управата за водење матична евиденција, поради бојкот на вработените.
Иако се присутни на работните места, службениците не издаваат документи во знак на протест поради ниските плати и нерешениот статус.
Вработените бараат зголемување на платите за 20 проценти, потпишување колективен договор и итно вработување на кадар кој недостасува за нормално функционирање на Управата.
Според Независниот синдикат, доколку не се исполнат барањата, можно е проширување на штрајкот во генерален.
Во Управата работат околу 350 лица, од кои најголем дел земаат минимална плата, а недостигаат повеќе од 90 вработени.
Од синдикатот предупредуваат дека состојбата е алармантна и дека поради ниските примања се очекува дополнителен одлив на кадар.