На Плоштадот на независноста во Софија беше одржан централниот протест со главно барање за оставка на владиниот кабинет на премиерот Росен Жељазков. На познатиот Триаголник на властите (каде се лоцирани централните бугарски институции) се собраа илјадници луѓе на протестите едноставно наречени „Протести“.
Мирни собири на граѓаните имаше во 25 бугарски градови, како и на повеќе локации во странство, известуваат бугарските медиуми.
Протестите почнаа како незадоволство од владиниот предлог за државниот буџет за 2026-та поради големите промени во даноната политика. Иако владата го повлече буџетот, незадоволството не изгасна и прерасна во „Бунт против власта“ како што ја наслови отворената програма за протестите, телевизијата БТВ.
Учесниците на протестот бараат оставка на владата на Росен Жељазков бидејќи сметаат дека овој кабинет всушност го водат долгогодишниот екс премиер Бојко Борисов и контроверзниот бизнисмен Дељан Пеевски.
Од први јануари, Бугарија влегува во евро-зоната и буџетот кој ги извади Бугарите на улични протести требаше да биде прв буџет изготвен и испланиран во единствената европска валута.
