Под слоганот „Стоп на геноцидот – маршираме за Палестина“, во Скопје се одржа протестен марш во знак на солидарност со палестинскиот народ и осуда на воените злосторства и опсадата на Газа.
Граѓани се собраа пред споменикот „Симфонија на мирот“ кон владата. Организаторите на маршот од иницијативата „Сите за Палестина“ нагласија дека настанот е дел од глобалното движење на отпор и солидарност, кое има за цел да го прекине молкот на меѓународната заедница и да изврши притисок врз владите да преземат конкретни чекори против израелската окупација.
Маршот заврши пред зградата на владата со повици за признавање на Палестина и конкретна политичка акција. Организаторите најавија дека овој марш е дел од поширока кампања за политички притисок и јавна мобилизација.
