Израел попладнево изврши воздушни напади врз Сана, главниот град на Јемен, пришто се гаѓани електрани, претседателската палата, воен комплекс, објави телевизија Ал-Масирах под контрола на Хутите. Нападот се случува по два дена од истреланата ракета од Јемен кон Израел.
Жителите на Сана велат дека нападите биле насочени кон подрачја во близина на претседателската палата, како ракетни бази и електрани. Израелската војска го потврди нападот.
Хутите пред два дена признаа дека истрелале балистички проектил кон Израел. Претставник на израелските воздушни сили денеска изјави дека проектилот најверојатно носел дополнителна муниција, наменета за „детонација при удар“.
„Таков тип на ракета за првпат беше истрелан од Јемен“, рече тој.
Хутите честопати лансираат ракети кон Израел од почетокот на војната во Газа од кои најголем број се пресретнувани. Јеменската милитантна група се поврзува со Иран и напаѓа бродови во Црвеното Море што го опишува како чин на солидарност со Палестинците.