Дебитантскиот долгометражен филм на Георги Унковски- „ Диџеј Ахмет“, на туку што завршениот филмски фестивал во Сараево освои три награди, меѓу кои и од публиката. Ова е круна на прекрасниот прием од гледачите во Сараево, вели неговиот режисер и сценарист, кој ексклузивно за Телма се јави од Херцег Нови, каде филмот ќе биде прикажан на тамошниот филмски фестивал, на 27 август. „ Диџеј Ахмет“ ќе има македонска премиера на затворањето на Фестивалот на филмска камера „ Браќа Манаки “ во Битола, а потоа го очекува кино- дистрибуција низ Македонија.
Прекрасен прием од публиката, што резултираше со награда. Вака режисерот и сценарист Георги Унковски, го коментира успехот на неговиот прв долгометражен филм „ Диџеј Ахмет“ , кој што на годинашново 31 издание на Филмскиот фестивал во Сараево, освои три значајни награди , со што стана едно од остварувањата со најголем број освоени признанија. Покрај UniCredit наградата од публиката , за најдобар долгометражен филм, со добиена највисоката просечна оценка од гледачите – 4, 9, што е највисок резултат меѓу сите прикажани долгометражни филмови на фестивалот, „ Диџеј Ахмет“ беше овенчан со Специјалната награда за перспективи на младите, што ја доделува Советот на Европа, во висина од 7500 евра и со наградата од престижниот филмски портал Cineuropa, во износ од 5000 евра.
- Посебно ми е драго што филмот беше прекрасно примен од публиката и што ја добивме наградата од публиката. Тоа беше шанса и за дел од екипата на „ Диџеј Ахмет“ прв пат да го погледне филмот . Така што тоа ми е посебно драго, рече Георги Унковски, сценарист и режисер на филмот.
Филмот раскажува за созревањето на 15- годишниот Ахмет, кој останува без мајка и се судира со традиционалните вредности на неговата јуручка заедница. Но, тука е и неговата прва љубов, за која се бори зашто е ветена на друг. Жанровски, „ Диџеј Ахмет“, е спој на драма и комедија, а во него се зборува на македонски и турски јазик. Се снимаше лани во радовишките села Коџалија и Али Коч и во Скопје. Главните улоги им се доверени на Ариф Јакуп, Дора Акан, Наим Агушев и Аксел Мехмед. На сценографијата работеа Дејан Ѓошевски и Александра Чевреска, костимограф е Роза Трајческа- Ристовска, шминката и маската се на Душица Вуксановиќ, а монтажата е на Михал Раих. Работен е како копродукција меѓу Македонија, Чешка и Србија, а продуценти се Иван Унковски и Ивана Шекуткоска.
По Сараево, филмот продолжува на фестивал во Херцег Нови, каде сега се наоѓа екипата, со проекција на 27 август. Неговата македонска премиера ќе биде на затворањето на ИФФК „ Браќа Манаки“ во Битола, на 26 септември.
- Од таму продолжуваме со кино- дистрибуција низ Македонија, па ќе има шанса македонската публика да го погледне „ Диџеј Ахмет“. А, потоа одиме во Велика Британија, Турција, па Шпанија и Франција. Очекувам уште многу фестивали и голема кино- дистрибуција за „ Диџеј Ахмет“ и се надевам дека тоа што побрзо ќе можеме да го споделиме со македонската публика, кажа Унковски.
Светската премиера на „ Диџеј Ахмет“ се одржа во јануари на фестивалот на независен филм „ Санденс“ во Парк Сити- Јута, каде освои две награди: Од публиката, во програмата Светски филм и Специјална награда од жирито, за креативна визија. „ Холивуд рипортер“ го опиша како инспиративна приказна за созревањето, а „ Скринанархи“ го пофали како солидно деби на Георги Унковски. Филмот освои и три награди во Кошице- Словачка, за најдобро остварување, за режија и за актер , што ја понесе младиот Ариф Јакуп.
Сотир Трајков