ТФТ Скопје конечно ја прекина низата од шест порази по ред во АБА2-лигата и денеска го совлада Шенчур со 85-77 во рамки на 10.коло на турнирот во Нови Сад.
Тимот од скопската населба Тафталиџе конечно проработи во регионалното натпреварување и денеска го имаше под контрола натпреварот со Шенчур. Водеше во текот на целиот натпревар, но го скрши противникот во третиот период, кога стигна и до највисоки +17 поени предност. Во последните 10 минути, ТФТ знаеше како да ја одржи предноста за конечна победа од 85-77.
Сардар Кадир Калхун со 18 поени беше најефикасен во редовите на скопскиот тим, а Виктор Ташовски имаше 16. Домен Петровиќ со 15 поени најмногу се истакна кај словенечкиот тим.
ТФТ сега има скор од две победи и осум порази во АБА2 и останува на претпоследната позиција, бидејќи само Шибенка има полош скор.
Останатите два македонски претставници во лигата, МЗТ Скопје и Пелистер утре ги играат натпреварите од 10.коло. Двата тима се во добра форма, бидејќи победија на претходните два натпревари, а „металците“ ќе се соочат со домаќинот на турнирот Војводина од 18 часот, додека битолчани ќе ги одмерат силите со Сутјеска точно напладне.
ФОТО: АБА Лига