Истрагата за кражбата на камион со марихуана кој беше украден во валандовско Јосифово, а најден во скопско Арачиново- се проширува, ама министерот за внатрешни работи не дава дополнителни податоци освен покачениот број на осомничени.
Истрагата се води и тоа не треба да се одвива пред камерите, најден е дел од марихуаната, се моменти кои ги открива Спасовски, додека за другото нема детали.
-Во моментот со пријавата се опфатени 8 лица. За сите лица за кои се води истрaга сигурно ќе се бара притвор бидејќи ова е акциска контрола која знаете е за сузбивање на недозволена трговија и шверц со дрога. Најденото е дел од количината што е украдена во Јосифово, а за тоа колку е најдено се уште се вршат активности и дополнително ќе соопштиме, одговори министерот за внатрешни работи Оливер Спасовски.
Истрагата која ја води одделот за криминалистичка полиција сега е насочен и кон групата од Арачиново, но се води и во Јосифово за да се открие како е украдена.
Товарот и објектот го чувал еден чувар, а законска обврска е фирмата да има постојано обезбедување, 24-часовно видео снимање на објектот, но и следење на произведеното.
Контролата дали овие заштитни мерки се спроведуваат е во здравство, а МВР е надлежна само за агенциите за обезбедување, вели Спасовски.
Украдената марихуана беше најдена завчера во полициска акција која според информациите на Телма почнала по дојава за судир на две семејства во Арачиново, а на крај се претвори со полициско откритие.
Но многу детали и натаму се нејасни, а се отвори и прашањето колку насадите и производите од канабис-фармите се безбедни за да не паднат во криминални комбинации.
Миомир Серафиновиќ