Случувањата во М-НАВ особено невозможноста да се воспостви работен ред и дисциплина во институцијата како и немањето соодветен дијалог помеѓу работодавците и синдикатот очигледно дека предизвикаа бранувања и во јавноста, меѓутоа и во институциите, изјави министерката за одбрана Славјанка Петровска.
Претседателот на Владата во консултација со мене како министерка за одбрана и министерот за транспрот и врски Благој Бочварски, донесе одлука дека на следната седница, тоа е седница во вторник на Владата, ќе предложи разрешување на директорите и управниот одбор на М-НАВ. Тоа е заради тоа што сакаме да ја испратиме пораката дека компромис со безбедноста на патниците и безбедноста на македонското небо нема да има и не смее да има. Истовремено ги повикувме и политичките партии и политичките движења во нашата држава, да не ги користат и да не ги злоупотребуваат ниту вработувањата, ниту вработените во оваа институција за остварување на својата лична агенда. Она што е најважно за граѓаните и за јавноста е дека авиособраќајот во Република Северна Македонија е безбеден и се одвива согласно правилата на Еуроконтрол, рече министерката Петровска.