Украинското јужно пристаниште Одеса рано утринава повторно беше цел на руски ракетни напади што пак дополнително фрла сенка на договорот кој што Украина и Русија минатата недела го постигнаа со посредство на Турција во Истанбул и со кој се предвидува непречен извоз на житарици преку Црното Море.
Според информациите на гувернерот на регионалната воена администрација на Одеса, Серхи Братчук, нападот бил извршен од воздух и притоа се активирале противвоздушните системи кои успеале да соборат неколку проектили.
Цел на масовни руски ракетни напади денеска е и пристаништето Миколаев, соопштија украинските власти.
OН претходно денеска најавија дека извозот на жито од Украина треба да почне во наредните денови и во исто време го осудија руското гранатирање на црноморското пристаниште по договорот за обновување на извозот на жито.
На овој напад му претходеше ракетирање и во саботата кога јужното пристаниште беше нападната со крстосувачки ракети. Украинскиот претседател Володимир Зеленски нападот го нарече „варварски“ и доказ дека на Русија не може да ѝ се верува дека ќе го почитува договорот.
Американскиот државен секретар Антони Блинкен пак оцени дека нападот врз украинското пристаниште „фрла сериозен сомнеж врз кредибилитетот на руската посветеност на договорот и ја поткопува работата на ОН, Турција и Украина да ја донесат критичната храна на светските пазари“.
На ова рускиот министер за надворешни работи Сергеј Лавров, кој е на турнеа во Египет, одговори дека Русија ќе ги исполни сите договори за извоз на жито и тврди дека нападите на Одеса нема да влијаат на процесот бидејќи како што посочи мета на руските сили се воени објекти и капацитети.
Ракетниот напад врз Одеса од саботата силно се рефлектираше и на берзантските тргувања со жито каде беше забележан голем скок во цената. На пазарот во Чикаго, цените на пченицата се зголемија на 7,85 долари за бушел (околу 288 долари/т), а истиот тренд се очекува да го следи и европската пченица.
Одеса е едно од украинските пристаништа од каде треба да се извезува житото, а е блокирано од почетокот на војната.