Повеќе од 117 милиони евра. Толку заработиле домашните банки за само девет месеци од годинава. Или исто колку што им бил профитот за цела година лани. Тогаш добивката им била 118 милиони евра. Податоците на Народната банка покажуваат дека ако продолжат со ова темподо крајот на годината, банките ќе постават историски рекордна добивка од кога постојат до сега. Експертите велат високиот профит е резултат на разликата меѓу ниските камати кои ги даваат за депозитите и високите кои ги наплатуваат за кредитите. Велат можеби е време да се размислува за прогресивно оданочување.
Бројките покажуваат дека покрај од камати, заработувачката на банките расте и од провизиите. Вкупно наплатиле 332 милиони евра од граѓаните и компаниите на име камати, провизии и надоместоци. 227 милиони евра биле само од камати, од кои најмногу дури 127 од домаќинствата.
Додека пак од провизии и надоместоци од граѓаните и фирмите наплатиле речиси 105 милиони евра- има за 30 милиони евра повеќе од истиот период лани.
Граѓаните негодуваат – велат провизиите и каматите на банките се превисоки за нашиот стандард.
Бројките покажуваат дека најдобро им одело на големите банки.
Податоците на Народната банка покажуваат дека речиси целиот профит од 117 милиони евра завршил кај петте големи банки. Тие за девет месеци од годинава прикажале добивка од 104 милиони евра. Кај средните банки завршиле 11,5 милиони, а малите прикажале добивка од 2 милиони евра.
Александра Филиповска