Блокада на Собранието и генерален штрајк се двата следни чекора што ги најави Сојузот на синдикати на Македонија (ССМ) по завчерашниот протест во Скопје. На Владата ѝ порачаа дека во понеделник ќе го потпишат колективниот договор за зголемување на минималецот на 600 евра, но од овој месец, а не за две години.
Првата блокада ќе биде следната недела, а ќе се блокира работењето на Собранието и пристапот на пратениците кај кои една година стојат законските измени за зголемување на минималецот.
Од ССМ ги повикаа сите работници во јавниот и во приватниот сектор да се приклучат на генералниот штрајк кој ќе се организира, но не го соопштија терминот.
Премиерот Мицкоски, пак, вината ја лоцира кај ССМ кои одбиваат да потпишат нов договор.
На прозивките од владеачката партија дека тој и УПОЗ се виновни што работниците нема да добијат 600 евра минимална плата во 2028 година, Трендафилов им реплицираше дека во моментов е 2026 година и им порача да се „вратат во реалност“.
За тврдењата на гувернерот Славески дека 600 евра минималец е популистичко барање, од ССМ му одговорија дека за разлика од 1.600 денари повисок минималец од април тој од следниот месец ќе има за 300 евра повисока плата.
Според ССМ, именувани раководни лица во „Македонски пошти“ и во „Тутунски комбинат Прилеп“ им се заканувале на вработените со отказ и казни, доколку го поддржат или учествуваат во завчерашниот протест.
Огнен Чанчаревиќ