Украинскиот претседател Волојдмир Зеленски изјави дека се надева на „конструктивна дискусија“ за безбедносните гаранции со американскиот претседател Доналд Трамп.
Во коментарите што следеа по средбата со канадскиот премиер Марк Карни во Халифакс, Зеленски рече дека „безбедносните гаранции мора да дојдат истовремено со прашањето за завршување на војната, бидејќи мора да бидеме уверени дека Русија нема да продолжи со агресијата“.
Се очекува Зеленски да се сретне со Трамп во Флорида денеска.
Претстојната средба е најновиот развој во обемниот дипломатски напор предводен од САД за завршување на речиси четиригодишната руско-украинска војна, но напорите наидоа на остро спротивставени барања од Москва и Киев.
Кремљ пак синоќа објави видео од рускиот претседател Владимир Путин во воена униформа како прима извештаи од врвни воени функционери во неидентификуван воен команден пункт.
Началникот на Генералштабот на Русија, генерал Валериј Герасимов, го извести на Путин дека руските трупи ја презеле целосната контрола врз Мирноград во регионот Донецк (Русија го користи старото советско име на градот), Димитров – и градот Хуљаиполе во регионот Запорожје.
- „Ослободувањето на Димитров (Мирноград) и ослободувањето на градот Хуљаиполе се важни резултати од борбените операции. Што се однесува до Димитров, ова е сериозен чекор кон целосно ослободување на Донецката Народна Република“, рече Путин во обраќањето.
Немаше непосреден коментар од украинските функционери.
Генералштабот на Украина во саботата попладне извести за обиди на руските сили „да ги потиснат украинските бранители од нивните позиции“ во голем број области, вклучувајќи го и Мирноград, и дека силите на Киев ги одбиваат „непријателските обиди за напредување“ во областите Хуљаиполе и Билохирија.
Зборувајќи со воени претставници, Путин повтори дека „доколку властите во Киев не се подготвени да го решат прашањето мирно, ние ќе ги постигнеме сите цели што ги имаме во специјалната воена операција со воени средства“.
Путин рече дека сега има „паметни луѓе на Запад кои препорачуваат властите во Киев да прифатат пристојни услови за завршување на конфликтот и да обезбедат добри основни услови за обезбедување на безбедноста на Украина во долга историска перспектива, услови за обновување на односите со Руската Федерација и обновување на украинската економија“.
Б.С.