Со 159 гласа „за“, од кои 156 од владејачката Нова демократија и три од независни пратеници, грчкиот Парламент вечерва го изгласа буџетот за 2026 година со што и заврши петдневната расправа што започна во петокот, а гласањето, традиционално во Грција се смета како глас за доверба на актуелната Влада.
Гласаа 295 од вкупно 300 пратеници, а против беа сите опозициски партии.
Претседателот на Парламентот Никитас Какламанис соопшти дека петдневната расправа што започна во петокот траеше вкупно 66 часа, се обратија 250 говорници, од кои 211 пратеници, 31 член на Владата и осумтемина претседатели на пратеничките групи.
Буџетот, меѓу другото предвидува раст од 2,4 отсто, дополнително намалување на невработеноста на 8,6 проценти, зголемување на инвестициите, намалување на инфлацијата на 2,2 отсто.
На гласањето му претходеа говори на лидерите на партиите и на грчкиот премиер Кирјакос Мицотакис.
Поради гласањето на буџетот, синдикатот на вработените во државниот сектор во Грција утрово започна 24-часовен штрајк, а претпладнево се одржа и мирен протест пред Парламентот.
Протест, попладнево одржи и синдикатот ПАМЕ на Комунистичката партија.