Цената на лебот нема да расте. Ова денеска го истакна претседателот на Сојузот на стопански комори, Горан Ѓорѓиевски, кој порача дека цената на пченицата е стабилна, како и цената на суровото сончогледово масло, како и дека не се очекуваат големи флуктуации.
Ѓорѓиевски додаде дека бизнисот не е за замрзнување на маржи, туку за пазарно формирање на цените и нагласи дека треба доследно да се применува Законот за нефер трговски практики.
Во врска со минималната плата, тој посочи дека е важен одржлив баланс бидејќи покачувањето влијае на зголемување на сите плати.
„Проблем не е бизнисот, туку администрацијата. Треба да научиме да работиме за да земаме плата,“ рече Ѓорѓиевски, додавајќи дека квалитетните работници во приватниот сектор земаат добри плати, а оние незадоволните си заминуваат.
