Луксембург има намера да ја признае државата Палестина, изјавија премиерот Лук Фриден и министерот за надворешни работи Ксавиер Бетел пред парламентарниот одбор.
Според локалните медиуми, конечната одлука за признавање се очекува да биде донесена подоцна овој месец на Генералното собрание на ОН во Њујорк, во координација со неколку други земји, вклучувајќи ги Франција и Белгија, објавува Политико.
Објавата вчера доаѓа по месеци двоумење од страна на владата на Луксембург и во услови на растечки повици од европските лидери за прекин на војната на Израел во Газа, која започна откако Хамас го нападна Израел на 7 октомври 2023 година.
Минатата недела, претседателката на Комисијата, Урсула фон дер Лајен, објави дека извршната власт на ЕУ ќе заземе построг став кон Израел во врска со војната, суспендирајќи ги исплатите кон земјата и санкционирајќи ги она што таа ги нарече „екстремистички министри“ и насилни доселеници.
Генералното собрание на ОН во петокот гласаше за усвојување декларација што содржи „опипливи, временски ограничени и неповратни чекори“ кон решение за две држави во регионот, пред состанокот на телото на 22 септември, според порталот од Брисел.