Украинскиот претседател Володимир Зеленски изјави дека 84 лица, меѓу кои војници и цивили, се вратиле од руски заробеништво како дел од нова размена на затвореници со Русија.
Некои од нив биле притворени уште од 2014, 2016 и 2017 година, а меѓу ослободените се и бранителите на Мариупол.
„Речиси сите имаат потреба од медицинска нега и значителна рехабилитација“, напиша Зеленски на Телеграм.
Од друга страна, руското Министерство за одбрана соопшти дека во рамки на размената биле вратени и 84 руски војници, кои моментално се наоѓаат во Белорусија каде што добиваат психолошка и медицинска поддршка.
Размената била спроведена со посредство на Обединетите Арапски Емирати.
Зеленски им се заблагодари на украинската воена разузнавачка служба, Координацискиот штаб за третман на воени заробеници, како и на Емиратите за нивната улога во размената.
Тој најави дека размените ќе продолжат, благодарение на храброста и ефикасноста на украинските сили на фронтот.
