Премиерот и министрите во четврток претпладне ќе станат од функционерските фотељи. Неколкумина од нив ќе се вратат само неколку дена подоцна, како дел од техничката влада, но дали ќе се пополнат и местата резервирани за опозицијата, сѐ уште е неизвесно откако премиерот најави дека доколку тие не го гласаат Џафери, мнозинството нема да ги гласа нивните министри.
На новинарска забелешка дека, токму СДСМ први направија преседан и во 2016-та година не гласаа за сопствените предлози во техничката влада, одговори дека тогаш тоа било од оправдани причини, поради отсуство на демократија.
Владата на Емил Димитриев беше избрана без пратеничката група на СДСМ, а нивните технички министри дадоа свечена изјава по три дена. Но и натаму, Ковачевски останува на ставот дека сегашната опозиција не смее да го стори истото.
Од ВМРО-ДПМНЕ остануваат на ставот дека нема да гласаат за техничкиот премиер.
Џафери исто така ќе си поднесе оставка на функцијата претседател на Собранието во четврток, за до изборите да биде технички премиер. На неговото место ќе седне координаторот на пратеничката група на СДСМ, Јован Митрески.
Новата техничка влада ќе се гласа во Собранието в недела на 28 јануари.
Далиборка Демјанска Цветановска